Asociacioni i Gazetarëve të Kosovës (AGK) ka reaguar pas raportimit të gazetarit kosovar Adriatik Kelmendi, për marrjen në pyetje nga ana e BIA-s serbe në vizitën e tij të fundit në Beograd.

AGK e konsideron të papranueshme këtë sjellje ndaj një gazetari, si dhe fton edhe Bashkimin Evropian të reagojë në lidhje me këtë sjellje që minon mendimin e lirë dhe procesin e pajtimit në rajon, transmeton arbresh.info

Reagimi i plotë:

Asociacioni i Gazetarëve të Kosovës e ka pranuar me shqetësim raportimin e gazetarit kosovar, Adriatik Kelmendi, për marrjen në pyetje nga ana e BIA-s serbe në vizitën e tij të fundit në Beograd.

Sipas Kelmendit, në fakt, ai është përballur me një sjellje të tillë të autoriteteve serbe secilën herë që i ka rënë të udhëtojë në Serbi, tash e një kohë. Kelmendit i janë kërkuar sqarime për pozicionet e tij publike.

AGK-ja e konsideron të papranueshme një sjellje të tillë ndaj një gazetari dhe aktivisti për pajtim rajonal.

Asociacioni i Gazetarëve të Kosovës e fton Bashkimin Evropian që të reagojë për këtë sjellje që e minon mendimin e lirë dhe procesin e pajtimit në rajon./arbresh.info/